Сатуев Хьусейн — Нохчалла.com — Чечня, чеченцы, обычаи, традиции, история и многое другое
Биографии на чеченском языке

Сатуев Хьусейн

 

Нохчийн  поэт  Сатуев  Хьусейн  вина  1939 – чу  шеран  апрель  беттан  11 – чу  дийнахь  1алханЮртахь. Шеен  заманхойн  массеран  а  санна, бераллин  а, кхиазхочун  а  шераш  Кхазахстанехь  чекхдевлира. Ма  дара  аьлча – м, бералла  хила  а  ца  хилира. Даймахка  ц1адирзинчул  т1аьхьа, шайн  юьртахь  чекхъяьккхира  юккъера  школа. 1958 – 63 –чуй  шерашкахь  дийшира  НохчГ1алг1айн  пачхьалкхан  хьехархойн  институтехь. Эскарехь  г1уллакхдарна, цьа  к1езиг  ханна Нохчг1алг1айн  яздархойн  Союзехь  литконсультанатан  балхана  юкъаравалар  доцург, хьехархочун  болх  беш  чекхвелира  Хьусейн  Сатуев. Цунна  деза  а, доккха  а   хетара  шена  дика  хууш  болу  нохчийн  мотт  къоначаьрна  марзбар  а, бовзийтар  а.

Поэтан  дуьххьарлера  стихаш  зорбане    евлла  1959 – чу  шарахь  ХьалхаМартан  районан  —  «Ленинан  Байракх»  а, республикан – «Ленинан  некъ»  а  газетийн, «Орга»  альманах  аг1онаш  т1ехь. 1967 — чу  шарахь  поэзиезархошка  кхечира  Сатуев  Хьусайнан  стихийн  хьалхара  гулар «Лаьмнийн  бер». Х1етахь  дуьйна  нохчийн  а, оьрсийн  а  меттанашкахь  стихийн, поэмин  10  сов  книгаш  арахецна  поэта: «Сахуьлу  седа»(1969), «Ненан  мукъамаш»(1971), «Дайн  байракх»(1975), «Йист  йоцу  аре»(1978), «Хазалла  йовзар»(1984), «Дахаран  аббат»(1988), «Чов  йина  илли»(1991).

1995 – чу  ш., хала  цамгар  текхначул  т1аьхьа, кхалхар  хилира  Сатуев Хьусейнан., амма  яха  йисна  цуьнан  поэзии, нохчийн  литературан  исторехь  шен  меттиг  д1алоцуш  ю  цуьнан  ц1е.

Оставить комментарий